Outra parte importante foi a recompilación de fontes e bibliografía, aprendendo a distinguir información fiable e a traballar con datos contrastados.

Despois pasouse á organización da conta de Instagram, onde se definiu como ía ser o proxecto: tipos de publicacións, estilo visual e reparto de tarefas. O alumnado asumiu diferentes roles como redacción de textos, deseño gráfico, edición de vídeos e xestión das publicacións.

A continuación, levouse a cabo a creación de contidos dixitais: publicacións informativas, infografías, carteis e vídeos curtos. Todo isto adaptando a linguaxe científica a un formato máis visual, claro e atractivo para redes sociais. Tamén se traballou a edición básica de vídeo, desde a gravación ata a montaxe final.

Dentro das actividades prácticas realizáronse entrevistas a persoas do ámbito científico e tecnolóxico, o que permitiu coñecer experiencias reais e achegar o mundo profesional ao proxecto.

O propio alumnado tamén gravou vídeos explicativos, presentando científicas, conceptos científicos ou pequenas experiencias relacionadas coa programación e o pensamento computacional, mellorando así a súa expresión oral e a confianza ao falar en público.